مع هانى لبيب:لو سكتنا على المتنمرين دورنا جاى واسألوا يسرا اللوزى وسوسن بدر

قال الكاتب هانى لبيب، رئيس تحرير "مبتدا"، إن أكثر الفئات التى تتعرض للتنمر هى المرأة، مشيرا إلى أنها أساس المجتمع، وهى خط التوازن الحقيقى النفسى والاجتماعى والعاطفى والحضارى لأى مجتمع ولأى دولة متقدمة.

وقال لبيب فى حلقة جديدة من برنامجه "من أول السطر"، الذى يقدمه عبر "مبتدا": "انت ابن ناس أو انت فلاح أو انت صعيدى أو انت ابن البواب أو انت ابن السواق أو انت ابن الخدامة أو ابن بياعة الخضار، حتى المريض النفسى بنقول عليه مجنون، المعاق اللى اتولد كده يا إما بنقول عليه منغولى ياما بنقول عليه عبيط، بدون ما نراعى أحاسيسه ومشاعره".

وواصل: "عندنا دايما توصيف للناس من وجه نظرنا، مع إنه إحنا كان ممكن نبقى فى نفس موقع الناس دى، سواء اتولدنا ولقينا عندنا إعاقة معينة أو أمراض معينة، أو اتولدت ابن بواب أو سباك".

وأضاف رئيس تحرير "مبتدا": "الأمثلة دى شكل من أشكال التنمر، وهى محاولة إيذاء أو إهانة أو إساءة لشخص بسبب فكره أو معتقده أو شكله، ودى حاجة عنصرية جدا، لأنه إحنا هنا بنتعامل مع الناس طبقا للى إحنا عايزين نشوفه، مش بنحترم شخصيته بأفكاره بانتماءاته بمعتقداته".

وبين لبيب: "عندنا نموذج واضح الفنانة يسرا اللوزى، عندها بنتها طفلة صغيرة صماء، بمنتهى البساطة واحد قام كتب (ماشى يا أم الطرشة)، الفنانة قالتله (شكرا على ذوق حضرتك، وقررت أستغل كلامك اللطيف علشان أقدم شوبة توعية بخصوص هذا المصطلح)، بدون مراعاة لأى مشاعر إنسانية، كان ممكن هو نفسه يبقى كده أو ابنه أو بنته".

وتابع: "نفس الموضوع حصل مع الفنانة القديرة سوسن بدر، كتبت بوست بتقول فيه (البقاء لله المخرج الموهوب المحترم حاتم على خبر صعب جدا الله يرحمه)، دخل واحد برضه بمنتهى البساطة من رواد السوشيال ميديا كتب (عقبالك)، الست ردت رد فى منتهى الاحترام والرقى (الموت رحمة ولطف من ربنا للطيبين لأنهم بيتمنوا لقاؤه أشكرك على دعاءك)".

واستطرد قائلا: "هو ده وضعنا أحيانا كتير بنكتب حاجات ببساطة فى العالم الافتراضى، إحنا عايشين حياة شكلها شكل مثالى غير اللى بنفذه على أرض الواقع".