حسام غالى
وتواجد حسام غالى نجم النادى الأهلى والمنتخب الوطنى السابق فى معسكر كابيتانو مصر، وتحدث عن لقب الكابيتانو الذى حصل عليه خلال مسيرته.
وقال حسام غالى: "لقب كابيتانو صعب جدًا وكان بيحط عليا ضغط كبير جوة الملعب وبرة الملعب، لأن كل حاجة محسوبة عليك".
وأضاف: "كابتن محمود الجوهرى رغم إنى ما اتدربتش معاه لكنه من أحسن المدربين فى مصر، وكان نفسى أتمرن معاه".
وتابع: "أكتر حاجة كانت بتعصبنى وأنا بالعب تعطيل اللعب وتضيع الوقت، وساعات كتير باخرج عن أعصابى لكن بيبقى نفسى أكسب وشخصيتى فى الكورة ما اتغيرتش فى الكورة".
وأشار: "لو ما كنتش لاعيب كورة كنت عاوز أبقى مهندس لأنى كنت شاطر فى الرياضيات، والمقارنة بين ميسى ورونالدو ما بتعجبنيش أنا بحب الاتنين".
وعن النصيحة التى يوجهها لنفسه فى الصغر: "ما حدش وجهنى وأنا صغير وأخدت المشوار كله لوحدى، لكن اتعلمت من كل اللى حوليا، وأنا صغير كنت باحلم أكون لاعيب كورة وحققت حاجات كتير من اللى حلمت بيها، وباهنى الطفل حسام غالى اللى شق طريقه لوحده ووصل للمرحلة اللى قد يوصلها".
وتقدم قناة "ON" بثًا مباشرًا للحلقة الجديدة من برنامج "كابيتانو مصر" لاكتشاف المواهب الشابة.
وتذاع حلقات برنامج "كابيتانو مصر"، الخميس والجمعة من كل أسبوع عبر شاشة "ON".
وأطلقت الشركة المتحدة للخدمات الإعلامية برنامج "كابيتانو مصر"، والذى يعد أكبر برنامج فى الشرق الأوسط لاكتشاف المواهب من كل أنحاء جمهورية مصر العربية.
