وفاء سالم
وكشفت وفاء سالم، مأساتها مع عمليات التجميل، خلال السنوات الماضية والتى كادت أن تقضى على حياتها وليس على مستقبلها الفنى فقط.
وقالت خلال تصريحات إعلامية لها: "أنا على مدار كذا سنة تعرضت لحقن وخيوط عند دكاترة كبيرة، وكنت كل مرة أروح لدكتور على أساس يصلحلى غلط اللى قبله".
وأضافت: "كل مرة كنت بتفرج على النتيجة، الاقى تشوهات فى وشى، والناس كانت بتتكسف تقولى، حتى كان أدائى مضايقنى جدا، إزاى كمملثة وأنا فى تشوهات فى وشى، لغاية إنى وصلت لمرحلة، إنى مش هروح لأى دكتور، لإنى كل ما أروح لدكتور يقولى احنا مش هنقدر نعمل أى حاجة".
وتابعت: "أنا دلوقتى بورى وشى لحضرتك من غير أى فلاتر ومن غير أى ميك أب، المناطق اللى فى وشى أغلب الأساتذة قالولى مش هنقدر نتدخل لإنها مناطق أعصاب، لحد ما ربنا كرمنى وقابلت أحد الأطباء المهرة الذى أنقذ حياتى ولم يحسن الأخطاء السابقة فقط".
وواصلت: "الدكتور عمل العملية وصورها لى فيديو، لقى إن الصديد واصل للشبكية وللمخ، الحمد لله ربنا أنقذنى، أنقذ حياتى، بعيدا عن إنى همثل أو مش همثل، الحمد لله إنى تجاوزت دا".
وكشفت خطورة وضعها الصحى بعد العمليات الفاشلة قائلة: "الصديد اللى حصلى كان من الحقن، وكان فى خيوط داخل وشى، أنا تعرضت لطول الوقت لشكل من أشكال الابتزاز، وكان نفسى إن دا ما يحصلش".
واستطردت: "أنا رجعت بنسبة كبيرة جدا لشكلى، رجعتلى وفاء، أنا عايزة وفاء اللى الجمهور حبها".
آخر أعمال الفنانة وفاء سالم كان مسلسل "القاتل الذى أحبنى"، بطولة الفنان هانى رمزى، سهير رمزى، أحمد فؤاد سليم، محمد جمعة، ياسر فرج، رانيا منصور، تأليف صلاح عربى، إخراج عمرو عابدين.
