دعاء الناس يوم عرفة رد لى الروح.. ياسمين عبد العزيز: التربى جهزلى المدفن

وتستضيف الإعلامية منى الشاذلى فى لقاء حصرى، النجمة ياسمين عبد العزيز التى تظهر للمرة الأولى مع زوجها النجم أحمد العوضى فى حلقتى الأربعاء والخميس 8 و9 ديسمبر، على قناة cbc.

وقالت ياسمين: "تانى يوم العملية، كان وقفة عرفة، العوضى نزل بوست الناس كلها ساعتها قعدت تدعيلى، ودخلت نيفين صاحبتى عليا فى العناية وقالتلى كلنا بندعيلك، والله أنا ساعتها كانت روحى بتتسحب وجالى شعور لأول مرة، شعور أن خلاص، وخسيت 15 كيلو، بقيت واحدة تانية، وقعدت أقول أنا كده خلاص، وكله عمال يعيط مش هاتسبينا يا ياسمين، لحد ما جه يوم عرفة، الناس كلها دعتلى، والدعاء كله كان من نصيبى، وبعد ما كنت باموت وبسبب يوم عرفة بقيت إنسانة تانية، طلعونى من العناية المركزة وبدأت أتكلم وردت فيا الروح، وطلعت الأوضة، ببص لقيت معدتى والأمعاء برة، قالولى دى بسبب العملية والقولون اتخرم، واتعاملت مع الأمر وأمعائى خارجة برة، وحصل بعد كده حاجة غريبة قعدت لمدة شهر لا بضحك ولا بعيط عندى صدمة".

وأضافت: "كنت داخلة أعمل عملية ساعتين ونص لقيت نفسى كده، فطبعا كنت مصدومة، وبعد ما سافرت للعلاج افتكرت إن قبل ما ادخل العملية بأسبوع، جاتلى رسالة من التربى، وعمرها ما حصلت أن التربى يبعت رسالة ليا، وباعتلى فيديو وهم بيجهزولى المدفن بتاعى".